Déi 43. Generalversammlung gouf e Sonndeg, 13. Februar zu Miersch 2022 am Lokal „Beim Batty“ ofgehalen. Nodeems an enger leschter Comitéssëtzung beschloss gi wor, den ale Comité opzeléisen, fir e neien Ufank ze huelen, wor d ’Präsenz an den Interessi vun de Memberen grouss fir gewuer ze ginn wéi et mat der Sektioun weider geet.

De President André Biver huet d’Leit begréisst an huet den FLPS President Jos Scheuer an de Grënnungsmember Fernand Gira entschëllegt. No enger Gedenkminutt un eis verstuerwen a krank Kolleegen, wou ganz speziell un eise Vize President a Frënd, John Palgen, geduecht ginn ass, deen eis am Laf vum Joer no laanger Krankheet verloos huet, mécht de President eng kleng Analyse vun dem Joer 2021. Pandemie bedéngt, wor et keen einfacht Joer, mais d ’Sektioun huet awer dat Bescht doraus gemaach. Mir hun un Meeschterschaften deelgeholl an och eng Sortie an Holland organiséiert.

An der leschter Versammlung hat den ale Sekretär d’Aufgab kritt fir kloer d ’Chargen an d’Responsabilitéiten vun de Comitésmemberen ze definéieren an eng nei Equipe opzestellen. No engem Opruff hu follgend Leit sech fir e bestëmmte Posten gemellt.

President: Biver André
Vize-President: Micucci Giovanni
Sekretär: Zangerlé Gilbert
Keessier: Peffer Pierror
Responsabel LM an Trainer: Hansen Jean-Pierre
Responsabel Sortien: Royer René

D ‘Versammlung huet d ’Kandidaturen fir de Comité guttgeheescht. Laut Statuten ginn d’Posten an der 1. Versammlung bestätegt.

Nodeems den Aktivitéitsbericht 2021 an de Keessebericht 2021 presentéiert an ugeholl goufen, wor et um Micucci Giovanni fir e klenge Rapport iwwer d’LM 2021 ze ginn an um Jean-Pierre Hansen iwwer d’WM 2021 ze schwätzen.
Traditiounsgemäss kruten d’Laureaten vun der Landesmeeschterschaft Medailen vun der Sektioun an en Diplom vun der FLPS iwwerreecht. (1. Giovanni Micucci. 2. Steve Schaaf, 3. René Royer). De President huet et sech net entgoe gelooss fir eis 1. Dame, d’Jessica Padjen, speziell ze éieren.

Och goufen déi laangjäreg Memberen ausgezeechent: 10 Joer PeM: Godefroy Jean-Marie, Maraschin Ralph, Maraschin Gilbert, Kremer Guy a Wagner Fred ; 25 Joer PeM: Klopp Jean-Claude, Resch Claude.

Mat der Presentatioun vum Programm 2022 an no enger klenger Diskussioun huet de President, André Biver, d ’Versammlung ofgeschloss. Déi nei/al Equipe wäert hiert Bescht maachen, fir nees, no de leschte schwéiere Joren, der Sektioun e neien Elan ze ginn.